558 432 432

სეო ოპტიმიზაცია

საქართველოში დიდი დრო დაჭირდათ იმის მისახვედრათ, რომ ნებისმიერ სერიოზულ საქმეს ვებსაიტი ისევე ჭირდება, როგორც სავიზიტო ბარათი. ბოლო დროს კი ნელ-ნელა იმის გაცნობიერებაც დაიწყეს, რომ მხოლოდ საიტის დამზადება საკმარისი არ არის და საჭიროა მისი რელევანტური ტრაფიკით უზრუნველყოფაც. ეს არის ყელა მნიშვნელოვანი რამ, რაც ვებდიზაინერმა საიტების დამზადებისას უნდა გაითვალისწინოს. Google-ის ალგორითმი საძიებო სიტყვების მიხედვით საიტების რანჟირებისას რამდენიმე ათეულ სხვადასხვა ფაქტორს ითვალისწინებს. ანუ, გუგლისთვის რამდენიმე ათეული ფაქტორი არსებობს, რომელთაც ის ანგარიშს უწევს ძიების შედეგების დალაგებისას. რამდენი მათგანია ცნობილი საძიებო ოპტიმიზაციაში გარკვეული ადამიანისთვის?! მაქსიმუმ 20-მდე – საძიებო სიტყვის/ფრაზის შესატყვისი com/net/org დომენი, დომენის ასაკი, საიტზე საძიებო სიტყვების პროცენტული მოცულობა, კონტენტის უნიკალურობა, ბექლინკები, სოციალური აქტივობა და ა.შ. მართალია, ეს ყველაზე მნიშვნელოვანი ფაქტორებია, მაგრამ მაინც ცოტაა. გავრცელებული აზრია, რომ დანარჩენ ფაქტორებს Google შეგნებულად მალავს და ამით სხვადასხვა სასტარტო პირობების, მოცულობის, ავტორიტეტისა და ასაკის საიტებს შორის კონკურენციის შესაძლებლობას ინარჩუნებს. ამ 20-მდე ფაქტორიდან ყველაზე მნიშვნელოვანია ის ფაქტორები, რომლებიც საიტის შიდა საძიებო ოპტიმიზაციას განსაზღვრავს. ამ ფაქტორების გათვალისწინების გარეშე საიტის დამზადება უბრალოდ აზრს კარგავს. 1. საძიებო სიტყვების განსაზღვრა. საძიებო სიტყვები(Keywords) ეს არის ერთი ან რამდენიმე სიტყვა, რომელიც საძიებო სისტემის მომხმარებლებში პოპულარობით სარგებლობს. რაც უფრო პოპულარულია საძიებო სიტყვა, მით უფრო მეტი პოტენციური ვიზიტორის მოზიდვის შანსი ექნება თქვენს საიტს. თუმცა, როგორც წესი, ძალიან პოპულარულ საძიებო სიტყვებში კონკურენციაც ძალიან მაღალია და საიტის პირველ პოზიციებზე გაყვანა ძალიან რთულია. სპეციალისტები განასხვავებენ მთავარ საძიებო სიტყვებს, საიდანაც ვიზიტორების დიდი ნაწილი უნდა წამოვიდეს და დამხმარე საძიებო სიტყვებს, სადანაც დამატებითი ტრაფიკის მიღების იმედი აქვთ. მთავარი საძიებო სიტყვა შეიძლება იყოს 2-5 ან მეტიც (თუ დიდი მოცულობის საიტთან გვაქვს საქმე), ხოლო დამხმარე საძიებო სიტყვების რაოდენობა რამდენიმე ათეულს შეიძლება აღწევდეს. ყველაფერი კონკრეტულ შემთხვევაზეა დამოკიდებული. საძიებო სიტყვების განსაზღვრისთვის სხვადასხვა ონლაინ სერვისები და პროგრამები გამოიყენება: Google AdWords Keyword Planner, WordTracker, Wordstat.Yandex და ა.შ. განსაკუთრებულ სირთულეს არცერთი ასეთი სერვისის გამოყენება არ წარმოადგენს, მაგრამ პროცესი მაინც სპეციფიურია, ამიტომ ჯობია საძიებო სიტყვების განსაზღვრის ეტაპი სეო ოპტიმიზაციაში კარგად გარკვეულ ვებ დიზაინერთან ერთად გაიაროთ. დიდი მნიშვნელობა აქვს ტექსტში საძიებო სიტყვების სიხშირეს(keyword density). ამასთან დაკავშირებით ბევრი განსხვავებული აზრი არსებობს, ოპტიმალურად 4-6% ითვლება. 2. საიტის დამზადების პროცესში მისი სემანტიკური ბირთვის განსაზღვრა შიდა ოპტიმიზაციის შემდეგი სავალდებულო ეტაპია. სემანტიკური ბირთვი წარმოადგენს საიტის გვერდების კონტენტში, ანუ სტატიებში, დასაშვები სიხშირით გამოყენებული მთავარი და დამხმარე საძიებო სიტყვებისა და ფრაზების ერთობლიობას. სხვა სიტყვებით, სეო ოპტიმიზატორმა უნდა განსაზღვროს სად რომელი გვერდი დაეთმობა კონკრეტული საძიებო სიტყვების გამოყენებით შედგენილ სტატიებს და ამის მიხედვით უნდა შეიმუშაოს საიტის აგებულება.

ვებ დიზაინერთან კომუნიკაციის წესები

ნათლად ჩამოუყალიბეთ ამოცანა. ნუ მოგერიდებათ საკუთარ საიტზე საკუთარი შეხედულებების ვებ დიზაინერისთვის გაცნობა. მაქსიმალურად გასაგებად აუხსენით როგორი საიტის დამზადება გინდათ, ამით გაუადვილებთ მას მუშაობას. თქვენი სურვილები თქვენს შესაძლებლობებს უნდა შეესაბამებოდეს. 200 ლარად კორპორაციულ საიტს ნუ მოინდომებთ. რამდენია თქვენი ბიუჯეტი? რომელ მისამართზე და სერვერზე უნდა იმუშაოს საიტმა? რა მოცულობის უნდა იყოს საიტი? რომელი განყოფილებები უნდა ქონდეს საიტს? რა მასალის განთავსება გინდათ საიტზე? რა ტექნიკურ მოთხოვნებს უნდა აკმაყოფილებდეს საიტი? სასურველია ამ და სხვა შეკითხვებზე პასუხი ვებ დიზაინერთან პირველივე შეხვედრისთვის უკვე მზად გქონდეთ. ზოგიერთი მათგანი კი უშუალოდ შეხვედრისას გაარკვიეთ. არ შეგეშინდეთ შეკითხვების დასმა. ვებ დიზაინერებს უყვართ დამკვეთების CSS, HTML, ASP, PHP და სხვა ტერმინებით დაბომბვა. ეს ერთგვარი თავდაცვითი ტაქტიკაა მათი მხრიდან რათა დამკვეთმა თავისი ადგილი იცოდეს და მუშაობაში ხელი არ შეუშალოს. მიუხედავად ამისა, მოითხოვეთ, რომ ყველაფერი თქვენთვის გასაგებ ენაზე აგიხსნან. ყოველთვის არა, მაგრამ ხშირ შემთხვევაში ეს შესაძლებელია. გამოიყენეთ Google. მას ყველაზე შეკითხვაზე აქვს პასუხი, მათ შორის პოპულარულ ენაზეც. სასურველია ვებ დიზაინერთან შეხვედრამდე გაეცნოთ ინფორმაციას ისეთ შეკითხვებზე, როგორიცაა „რა უნდა ვიცოდეთ ვებ დიზაინერთან შეხვედრისას“, „ვებ დიზაინერთან კომუნიკაციის წესები“ და ა.შ. ამით ბევრ გაუგებრობას აიცილებთ თავიდან და უფრო თავდაჯერებულიც იქნებით. კონტენტზე წინასწარ იზრუნეთ. დროულად მიაწოდეთ ვებ დიზაინერს აუცილებელი ტექსტური, ფოტო, აუდიო და ვიდეო მასალა. რაც უფრო ოპერატიულად მიაწოდებთ ამ ყველაფერს, მით უფრო მალე ჩაგბარდებათ თქვენი საიტი. ნუ შებოჭავთ საკუთარ ფანტაზიას. კარგი ვებ დიზაინერი თქვენს ნებისმიერ სურვილს განახორციელებს. თუ ის გეუბნებათ, რომ რაღაცის გაკეთება შეუძლებელია, შეიძლება ეს სიმართლეც იყოს, მაგრამ ზოგჯერ პროფესიონალიზმის ნაკლებობაზეც მეტყველებს. ასეთ დროს დამაჯერებელი ახსნა-განმარტება მოითხოვეთ. ეცადეთ არ დააჩქაროთ ვებ დიზაინერი. საიტის დამზადება შრომატევადი საქმეა. ზოგიერთი წვრილმანის გაკეთებას საათები ჭირდება. თუ არ გინდათ, რომ ხელში უფერული დიზაინი შეგრჩეთ, მოთმინება იქონიეთ

პრობლემატური შეკვეთის ნიშნები

საიტების დამზადება, ისევე როგორც ბიზნესის ნებისმიერი სხვა სფერო, არ არის თავისუფალი გარკვეული რისკებისგან. ქვემოთ ჩამოთვლილია ის ნიშნები, რომელთა მიხედვითაც შესაძლებელია საეჭვო შეკვეთის იდენტიფიცირება. თითო-ოროლა ასეთი ნიშანი ჯერ კიდევ არ არის საგანგაშო, მაგრამ თუ სახეზე ერთდროულად რამდენი მათგანია, ასეთი შეკვეთისგან თავის შორს დაჭერა ჯობია. დამკვეთთან პირველი კონტაქტი ოფის-მენეჯერთან ხანმოკლე საუბრითა და 1 დაჭმუჭნულ ფურცელზე ამობეჭდილი საკონკურსო პირობების მიღებით შემოიფარგლება. ასეთ დროს 99% დარწმუნებული იყავით, რომ კონკურსი მხოლოდ ფორმალობაა. სინამდვილეში ის კარგა ხანია ჩატარდა და გამარჯვებულიც ნაცნობობა-ნათესობა-მეგობრობის საუკეთესო ქართული ტრადიციების მიხედვით გამოვლინდა. დამკვეთი თავს იკავებს საიტის დამზადებისთვის გამოყოფილი ბიუჯეტის გამხელისგან. ეს შეიძლება ნიშნავდეს, რომ დამკვეთი არ გენდობათ და ჰგონია, რომ ბიუჯეტის გამხელით მაღალი ფასის დასახელებისკენ გიბიძგებთ. დამკვეთს საიტის დამზადება მაქსიმალურად იაფად უნდა, ან ამბობს, რომ ბიუჯეტი ძალიან მწირია. ეს თითქმის ყოველთვის ნიშნავს, რომ დამკვეთი დიდ მნიშვნელობას არ ანიჭებს საკუთარი საიტის ფლობას და ხარისხს სიიაფე ურჩევნია. ეს ის შემთხვევაა, როდესაც დამკვეთი საკუთარ ფულს ხარჯავს და მინიმალური დანახარჯებით მაქსიმუმის მიღება უნდა. დამკვეთს იმაზე მეტი სურს, ვიდრე მისი ბიუჯეტი გაწვდება. ასეთ შემთხვევაში მისი დაკმაყოფილება რთული იქნება და რაც უფრო ადრე აუხსნით ამას, მით ნაკლებ დროს და შრომას დახარჯავთ ტყუილად. დამკვეთი ამბობს, რომ თქვენს გარდა კიდევ რამდენიმე დიზაინერისგან ელოდება საქმიან წინადადებას. ეს შეიძლება სიმართლეც იყოს, მაგრამ ასე იშვიათად ხდება. გაცილებით უფრო ხშირად ეს ნიშნავს, რომ დამკვეთს მხოლოდ ფასების გაგება უნდა(მაგალითად საგრანტო პროექტისთვის) და დროს ტყუილად გაკარგვინებთ. პოტენციური დამკვეთი ითხოვს, რომ საქმიან წინადადებასთან(ფასები და ა.შ.) ერთად დიზაინის მინიმუმ ერთი ვარიანტი(ზოგჯერ 2-3) მაინც გაუგზავნოთ. ეს ერთ-ერთი ყველაზე საგანგაშო სიგნალია! ასეთი მოთხოვნა ზოგჯერ გაუაზრებელია, მაგრამ ხშირად მისი მიზანია რაღაც სილამაზის კონკურსის მაგვარის მოწყობა, რის შედეგადაც თქვენი დიზაინერული მიგნებები გარანტირებულად იქნება გამოყენებული იმ შემთხვევაშიც კი, თუ კონკურსს ვერ მოიგებთ. პოტენციური დამკვეთი ანაზღაურების ნაცვლად პროექტიდან წილს გთავაზობთ. ასეთ შემოთავაზებას მხოლოდ იმ შემთხვევაში დათანხმდით, თუ შემდეგი რამდენიმე თვის განმავლობაში მუქთად მუშაობის იდეა გხიბლავთ. დამკვეთი ხშირად იყენებს ჯადოსნურ სიტყვას „კრეატიული“, რაც მისთვის, როგორც წესი, გარეგნულ სილამაზესთან ასოცირდება. ასეთ დამკვეთებს უჭირთ იმის გაგება, რომ სილამაზე კარგია, მაგრამ მთავარი არ არის. მოსახერხებელი ნავიგაცია და საჭირო ინფორმაციის ადვილად მოძებნა ბევრად უფრო მნიშვნელოვანია, ვიდრე ვიზუალური დიზაინი. კომერციული დანიშნულების საიტისთვის ზედმეტად ლამაზი დიზაინი ხელისშემშლელ ფაქტორადაც კი შეიძლება იქცეს. თქვენგან მოითხოვენ საიტის დამზადებას სწრაფად, რომელიმე კონკრეტული თარიღისთვის. ასეთ დროს, მაღალი ალბათობით, დამკვეთმა დიდი ხნის წინ იცოდა დედლაინის მოახლოების შესახებ, მაგრამ დროის დიდი ნაწილი საკუთარ თავმოუბმელობას გადააყოლა. თავმოუბმელი დამკვეთი პრობლემაა. განსაკუთრებით, საიტის მასალების მოწოდების და თანხის დაპირებულ ვადებში გადახდის თვალსაზრისით. დამკვეთის მხრიდან არ არის პროექტის კოორდინატორი. ასეთ შემთხვევაში, ამ როლის შესრულება ვებ-დიზაინერს უწევს, რაც მისგან დამატებით დროს და რესურსებს ითხოვს. რაც ყველაზე ცუდია, როდესაც დამკვეთი დიდი კომპანია ან ადამიანთა დიდი ჯგუფია, ვებ-დიზაინერის დრო შიდა შეუთანხმებლობისა და კინკლაობის გამო, ტყუილად იკარგება. დამკვეთს არა აქვს საიტისთვის საჭირო ფოტოები, სტატიები და ა.შ. ქართულ კომპანიებში ეს საკმაოდ გავრცელებული სენია. როგორც წესი, 1-2 ფლაერი უგდიათ ხოლმე და გონიათ, რომ ეს საიტისთვის გამოდგება. მზად იყავით, რომ ასეთ დამკვეთთან ურთიერთობა რამდენიმე თვეს გაიწელება. თუ საერთოდ შედგა. დამკვეთი აგვიანებს საიტისთვის საჭირო მასალების მოწოდებას, მასთან დაკავშირება რთულია. აქ ორი ვარიანტია – დამკვეთი ან არასერიოზულად ეკიდება თავის საქმეს, ან პირდაპირ ვერ გეუბნებათ, რომ გადაიფიქრა, რაღაც არ მოეწონა და სხვა შემსრულებელი მონახა.

Web Studio & Web Marketing Company

ჩვენ ვქმნით ვებ გვერდებს რომელიც მუშაობს

გეგმა  დიზაინი  პროგრამირება